Lëvizja Shqipëria Bëhet ka depozituar në Gjykatën Kushtetuese kërkesën për shfuqizimin e Aktit Normativ nr. 3, datë 06.07.2026, përmes të cilit është akorduar fondi prej 400 000 000 lekësh për financimin e pjesshëm të koncertit të Kanye West. Në kërkesë kërkohet pezullimi i menjëhershëm i zbatimit të aktit, shfuqizimi i tij si i papajtueshëm me Kushtetutën, si dhe, në rast miratimi nga Kuvendi, shfuqizimi i ligjit miratues sipas procedurave kushtetuese. Shqipëria Bëhet vijon angazhimin për mbrojtjen e shtetit të së drejtës, transparencën dhe interesin publik.

Shqipëria Bëhet zhvilloi një takim me delegacionin e organizatës ndërqeveritare International IDEA, ku u prezantuan shqetësimet mbi situatën politike në vend, sfidat e ndërtimit të institucioneve funksionale dhe rëndësinë e forcimit të demokracisë pjesëmarrëse. Gjatë takimit u diskutuan nismat e Lëvizjes për rritjen e rolit të qytetarëve në vendimmarrje, përfshirë angazhimet për votën e diasporës dhe fushatën për mbledhjen e 100 mijë firmave për zhvillimin e një referendumi popullor.

Shqipëria Bëhet ka nisur zyrtarisht mbledhjen e 100 mijë firmave për zhvillimin e referendumit popullor që synon shfuqizimin e ligjit "Për Investimet Strategjike" dhe "Paketës së Maleve". Procesi synon t'u japë qytetarëve mundësinë të vendosin drejtpërdrejt përmes referendumit mbi dy çështje që lidhen me pronën, territorin dhe interesin publik.