Protesta e katërt kombëtare e Lëvizjes “Shqipëria Bëhet” mblodhi qytetarë nga Shqipëria dhe diasporë para Kryeministrisë

Në Bulevardin “Dëshmorët e Kombit”, përpara godinës së Kryeministrisë në Tiranë, u zhvillua protesta e katërt kombëtare e organizuar nga Lëvizja “Shqipëria Bëhet”.                                        Qytetarë të shumtë nga e gjithë Shqipëria, si dhe përfaqësues të diasporës të ardhur enkas nga vende të ndryshme të botës, iu bashkuan thirrjes për protestë kundër korrupsionit dhe qeverisjes aktuale.

Në fjalën e tij para protestuesve, Lapaj renditi një sërë çështjesh dhe aferash që, sipas tij, implikojnë qeverinë e drejtuar nga Edi Rama. Ai përmendi rastin e zëvendëskryeministres Belinda Balluku, si edhe çështje që lidhen me Agjencinë Kombëtare të Shoqërisë së Informacionit (AKSHI), duke theksuar se këto janë arsye të mjaftueshme, sipas tij, për dorëheqjen e qeverisë.

“Sot jemi në ditën e 55-të të qëndresës përpara kësaj godine, që do të mbahet mend si godina e zaptuar. Çdo ditë që kalon forcon bindjen se vendi ka nevojë për ndryshim të thellë,” u shpreh Lapaj, duke i bërë thirrje qytetarëve për bashkim dhe angazhim qytetar.

Ai deklaroi se dalja publike e zëvendëskryeministres në krah të kryeministrit në takime zyrtare përbën, sipas tij, një mesazh sfidues ndaj institucioneve të drejtësisë, duke theksuar se lufta kundër korrupsionit duhet të jetë reale dhe jo fasadë.

Gjatë protestës, pjesëmarrësit mbanin pankarta me mesazhe kundër korrupsionit dhe kërkonin dorëheqjen e kryeministrit. Në tubim u theksua se lëvizja do të vijojë qëndresën deri në realizimin e kërkesave të saj, përfshirë dorëheqjen e kryeministrit dhe krijimin e një qeverie tranzitore deri në mbajtjen e zgjedhjeve të parakohshme.

Një pjesë e konsiderueshme e protestuesve ishin shqiptarë nga diaspora. Një qytetar i ardhur nga Londra, i cili jeton prej 27 vitesh jashtë vendit, u shpreh se kishte ardhur enkas për të marrë pjesë në protestë, duke e konsideruar këtë si një detyrim moral ndaj familjes dhe atdheut. Edhe Dritan Toci, gjithashtu nga Londra, deklaroi se kishte kontribuar me mjete logjistike për të mbështetur qëndrestarët që prej javësh qëndrojnë para Kryeministrisë.

Në përfundim të fjalës së tij, Adriatik Lapaj theksoi se protesta nuk do të ndalet dhe se qëndresa do të vazhdojë deri në arritjen e objektivave të shpallura nga Lëvizja “Shqipëria Bëhet”. Ai u bëri thirrje të gjithë qytetarëve që t’i bashkohen protestave në vijim, duke e cilësuar këtë moment si vendimtar për të ardhmen e vendit.

‍